Luk 12 | LpxULB | STEP | Ta nafa etutubahini huwo anaboite alif arria many eririo hejek hosie, ette inyeja hitiara hijo de lefahat illohonyie daŋ, “Ihuma riŋa bula inno Farisei, hetimiyahak illo kwaite.

Luke 12

1 Ta nafa etutubahini huwo anaboite alif arria many eririo hejek hosie, ette inyeja hitiara hijo de lefahat illohonyie daŋ, “Ihuma riŋa bula inno Farisei, hetimiyahak illo kwaite.

2 Hati obe iso nabo sihin eŋofa, nolobe iso oremik alew, obe iso lobo sihin leleŋofahini, obe egonyuni. 3 Hirro inne ero itai te idumele etirini iso de icala, ojo hirro inne ehahayak iye do huwok to hotwai haji, etikwat iso huwo to hide ha haji.

4 Ajo naŋ da hatai motiarak hanaŋ, ibaŋa labaŋ ille lotohoi kwan, ojo Da halu enyiei isieja enyiak higem hinnak hirro. 5 Hati asor iso naŋ itai tihoni lie leremik itai baŋi, itibaŋ lie lotohoi, lolowuon ho golon he birohini iye do hima, ajo naŋ dahatai, itibaŋ inyeja.

6 Obe hati logoribiaha miet letinyaŋari ta arobiya hullo kai? Obe hati lobo hidonye tere hosie eremik aguori to hosiere Hollum. 7 Hati hofir inne to hossi hatai daŋ ehenuni. Baŋa labaŋ. Ewuon itai ho ilibiti arria agalik logoribiaha arria.

8 Ajo naŋ dahatai, tihoni lie loloremik hilima naŋ do honyie aremik iso hidofe naŋ elimak inyeja do hosiere ho Hollum, ohu iso Lenyi tihoni hidofe ŋasalak hipalita do hosiere anjillohien illo Hollum. 9 Ojo lie lolorissa naŋ do hosiere ho huwo orrisa iso hidofe inyeja do hosiere no anjillohien illo Hollum. 10 Huwo daŋ ille lerota hirro inno lorru de Lenyi tihoni, ebusahini iso inyeja, hati do lie leleturuo fure no Oholio lolibo, obe iso inyeja ebusahini.

11 Laŋaiyani isieja itai ahosiere ho Sinnagogi, de hekumok, de leitaha, ibaŋa elafuho do inno lefuo itai hirro efari itai kwaite innahatai, kuya hirro inne lefuo iso itai hijo, 12 Hati ohu iso Oyiri lo Lolibo hitiyana itai da sa nyie hirro lefuo itai hirro.”

13 Niya eijo lobo tihoni to hiji ho iluluuŋ, “Hetiyanani, ilimak ilasi hanaŋ hotobwany ho naŋ ibariti.” 14 Ette Yesu hijo do honyie, “Illeŋ, ŋai lojo ara naŋ hekumoni kuya alohe lahataiŋ?” 15 Ette inyeja hijo dohosie daŋ, “Ihunma riŋa hotobiaŋa wahan ne hiŋaru ojiŋak da tajia hatai. Nyo obe manya no tihoni ara himunya no ibariti innohonyie.”

16 Ette Yesu elimak dohosie hitiriamita, “Odon ifa mana no lobo tihoni hasamani binno, 17 Ette inyie higigil to kwan honyie hijo, ‘Ehum iso naŋ jai nyo abe naaŋ awuon ho mai na attunari ŋamaŋ?’ 18 Eijo inyeja, ‘Ahu naŋ higem tiji. Ahu iso naŋ anitok ibhatiha da fau ette inyiak aduhok inne hitoha, ajo naŋ tere atunahini ŋama hanaŋ daŋ ho saŋ hulle. 19 Ajo iso naŋ do oholio hanaŋ, “Oholio, ewuon iye iko hirro arria innafa lotuna da ŋasi arria. Toyiria dee, tadahai, tamettei, itihabuoi.”’

20 Hati eijo Hollum do honyie, ‘Lobolit illeŋ, harie inna heinna, awahan oyiri tere hoi. Hirro inne letunak iye, ara iso inna ŋaiŋ?’ 21 Ara iso ne iya tihoni lolutnak to kwan honyie hibariti lenya labara do Hollum.“

22 Eijo Yesu de lefahat illo honyie, “Tia ajo naŋ da hatai, ibaŋa elafuho manya nahatai iko hirro inne lefuo itai iso daha kuya kwan nohoi- hijo hara iso hirro inne licefo itai nyo. 23 Agalik manya ŋiria, ojo kwan agalik boŋojin.

24 Itogil ohurrahi, obe isieja oyek hinyomo kuya dioŋo. Obe lowuon ho mugu hati etama Hollum isieja. Hati elibo itai egalik 25 cieŋ! Ŋai lobo lahatai loremik afonik kai far do honyie no waran! 26 Ŋa lobe lobe itai eremik higem ille lettiŋ, nyo elafuho itai te innamuk?

27 Itiwolo turren inno yani, obolo isieja jai. Obe isieja egiama, obe lenyaŋa, ajo naŋ da hatai ara ida hido Solomona ta lamanyari honyie daŋ obe ifa ecofo boŋojin iyane. 28 Iya leticefo Hollum hidofe miaŋ nyie tohotuai mana nyie lowuon ena ho moite ebirohini da ma nolosuahari garanyanya, obe iso inyie eticef itai, itai hulloŋ lodico huruk!

29 Ibaŋa letitifa hirro inne lefuo itai daha ho inne lefuo itai himat, baŋa lelafuho. 30 Osiaha huwo ta fau daŋ hirro inne daŋ hati oyien Monyehatai hijo ewak itai hirro inne.

31 Hati itufai Obie no Hollum hati iso saŋ inne daŋ ofonihini dahatai. 32 Ibaŋa labaŋ, kioro hulloŋ hitiŋi, nyo omuno Monyehatai hiso da hatai Obie.

33 Itinnanyaŋak ibariti innahatai ette itai hiso do lociaŋak. Ihuhumak kullosien do kwaite innahatai inno lobe iso eremik guasa etunari ibariti inne ido inne lobe eriamik hiruat ajai. No lobe hoholak afanu aŋhati, no lobe ittoŋ eremik hiturru. 34 Mai nolowuanari ibariti innohoi, owuon iso taji nohoi de.

35 Ititodok boŋojin innahatai ta gas ahotuai, isiara lomohien innahatai hotodule wuloi, 36 Itiwuana iya huwo ille letila leitok hose, laŋacohini inyeja tere hiyama, nyo laŋawoŋ inyeja hikukuk ikat anyar honyie lesony hiŋa ikat do honyie.

37 Hotowuana jaha de haigemak luha leriŋa laŋarrumu Leitok isieja leitila laŋawoŋ inyeja. Dede elimak naŋ da hatai hijo efitak iso inyeja hofito nohonyie de ihuluk honyie, ehumak isieja hetolojo da fau hettedahai. Ojo ottu iso ette higiama do hose. 38 Lenyiak Habu ŋawoŋ ta harie hitarrihi neleriria, kuya many do hiriria hitahunihi, ottu ŋarrumu lodule, hotowuana jaha do luha legiama.

39 Do inne anyar eyien inyie far no ottuni lohoho, monye haji hobe da lobusak haji honyie hesiahari lohoho ade. 40 Eijo itai hidofe daŋ iririai, ibe itai eyien hijo anu iso ocohini Lenyi tihoni.“

41 Eijo Peturu, Habu, ero iye hitiriamita inne dohooi hamai kuya do huwo daŋ?” 42 Eijo Habu, “Ŋai iso hati hido le leruk ojo hido ara a heririani lolotu Habu lohonyie hihaf ahide do luha legiama honyie hesiara do hosie ŋiria nohose da far nalawahari isiejaŋ?” 43 Hettejaha iso haigemani lie, lolodule higiama de letok many orrumuni inyeja laŋacohini leitok. 44 Dede, elimak naŋ itai hijo ehumak iso inyeja inyie daŋ a hosiere honyie.

45 Hati leijio haigemani lie ta taji honyie, ‘Etiliŋa habu hanaŋ ŋacohini nohonyie,’ ette hitiara baha luhe ho nuhe haigemak inno ŋoruo, ojo adaha, amette ottu ŋawoŋ ruma, 46 Ottu iso habu lo haigemani da nabo holoŋ inna lemiŋari inyeja obe leriria, hati de mau lettiŋ lelanyari loyien, te oŋot iso inyeja hullo hitiŋi ette ŋanyimok mai nyie dohonyie iko illo lobe leruk.

47 Heigamani lie oyien hiram na Habu, ojo lodule, obe hidofe egiem iya lawak inyeja, abaha iso inyahita arria. 48 Hati lie lolobe loyien, ette higem hirro inno loremik baha, abaha iso inyahita kai. Huwo daŋ luhe lemiettehini esiarahini do hose, emiette iso hifia honyie. Ojo dohose luhe lotunak no efia iso inyeja isieja no.

49 Attu naŋ ebirok hima da fau, ajo naŋ hijo asuahahini mahu hafa beren. 50 Hati owuon bhatisimo da hanaŋ iya awak naŋ hibhatiso nyo awak naŋ hijo hesaha igem ne!

51 Egigillo itai hijo attu naŋ hiso himora da fauŋ Obe, elimak naŋ itai hati buanya. 52 Hati ena many ahosiere owuon iso hibibuanya da haŋitek many ean owon iso miyet da haji, huwo lohunik oliwari ohori kuya lohorik oliwari huwo lohunik. 53 Obuanya iso isieja, oliwari iso monye hito, ojo monye hotonye, ojo hotonye oliwari ŋani, ojo ŋai oliwari hotonye; ojo hotonye oliwari homone ojo homoni hito noŋoruo oliwari homoni.”

54 Ero ifa Yesu de iluluŋ,”Legonyu itai idoho te hiduoŋi no holoŋ loreu, asonya itai hijo ‘awoŋ itiran tai edoŋ inyie.’ 55 Atti legonyu itai loyami lohutuni tere ho ŋolon, ette itai hijo ‘Eno holoŋ nohon ette hidoŋ. 56 Hetimiyahak ho kwaite, eyien itai hahieru hirro inne eidoŋ da fau iko te idoho, jai hati ebe itai eremik hilloit hirro inno enaŋ?

57 Nyo ebe itai eŋotok hirro inno olibo dahatai? 58 Lefuo itai ho hebalahani lohoi ahosiere ho haŋotoni, to hikoi, itibisak ho inyeja hiram nyie, hotobiaŋa inyeja eyari ahosiere ho lokiko hijo hotobiaŋa ofuo ehumak iye a hotuai Babus. Ajo naŋ da hatai, ibe iso itai eremik afanu ade many edumari itai arobiya hullo hitiŋi.”